مصنفین کے لیے رہنما اصول
تحریر کے اخلاقی اصول
صراط پبلیکیشنز سے کتاب شائع کرانے والے تمام مصنفین سے گزارش ہے کہ اپنی تحریر میں درج ذیل اصولوں کا لحاظ رکھیں — تاکہ ہماری کتب وقار کے ساتھ علم پھیلائیں، انتشار نہیں۔
چھ بنیادی اصول
کتاب میں کسی کو ذاتی طور پر نشانہ نہ بنائیں۔
تحریر میں اس طرح کے الفاظ کا استعمال نہ کریں جو تہذیب کے دائرے سے باہر ہوں۔
اس طرح کا انداز بیان اختیار نہ کریں اور نہ اس طرح کا مضمون تحریر میں شامل کریں جو نفرت یا تشدد کو جنم دے۔
اہل سنت و جماعت میں پہلے ہی سے اس طرح کی منفی قوتیں اپنی جگہ بنا چکی ہیں جو ان کے شیرازے منتشر کرنے میں لگی ہیں۔ اس امر کو نگاہ میں رکھتے ہوئے اس قسم کے انداز بیاں، الفاظ کے انتخاب اور مضامین کی ترجیحات سے پرہیز کریں جو اہل سنت و جماعت میں تقسیم اور انتشار کو بڑھاوا دے سکتی ہیں۔
ممکن ہے کہ آپ نے جس موضوع پر کتاب لکھی ہے اس موضوع پر صراط پبلیکیشنز پہلے ہی کوئی کتاب شائع کر چکا ہو اور اس میں جو موقف اختیار کیا گیا ہو وہ آپ کے موقف سے مختلف ہو۔ اس صورت میں آپ اس اختلاف کو اپنی مخالفت نہ سمجھیں۔ ہو سکتا ہے کہ وہ کتاب اس موضوع پر کچھ ایسے گوشوں کو اجاگر کر رہی ہو جن پر بعض دوسرے مصنفین یا محققین کی نظر نہ گئی ہو۔
اور اگر یہ بات نہ بھی ہو تو بھی اس بات کو ذہن میں رکھیں کہ اہل سنت کے درمیان ایک مسئلہ پر دو یا اس سے بھی زیادہ موقف ہو سکتے ہیں، اور چونکہ وہ تمام موقف اہل سنت کے درمیان سے ہیں اس لیے ان کا احترام کیا جانا بہتر ہے۔